Centrostudibaresi.it

Tradizioni popolari baresi

Natale

La dì-apprìisse tutte le uaggnùne scèvene pe le càsre de le parìinde p’avè ngocch’e ddolge e non zòle.
L’amìisce se scangiàvene le piattecìidde de le dolge c’avèvene fatte, im-mote ca oggn’e iùne assaggiàve le cose fatte do u-alde. Acchesì pe le strate, se vedèvene le vaiàsse ca scèvene cu piattecìidde acchemegghiàte da nu pannolìne, pe pertàuue a le parìinde de le seggnùre addò stèvene a servì.
Chidde du pòbbele vassce c’avèven’acchemenzàte la dì de la Vesscìgglie a scequà a la stoppe che ttutte le scommèsse, condinuàvene angòre a dassìlle iìnd’a le rècchie, e se spedecchiàvene che ttutte u sendemènde.
Acquànne nu scequatòre non denève terrìse trave la mìsere.
L’alde scequàvene a la tòmbele che tutte la morre de le verrìggue apprìisse. Chidde ca tenèvene u vìzzie de la candìne se scèvene a ffà nu quìnde o scequàvene o zembarìidde.
A menzadì, tutte a tàuue, se mangiàve:
“BBrote de vicce cu granerìse e vvèrze, u vicce a bellìte, tembàne (mò dìscene: tembàlle) de maccarùne o furne che le polpètte. Pò capùzze o furne, mìinze zite che le brasciòle, ghiemmerìidde o spite, tacche na veldàte e na geràte, tomàcchie, meggnìitte, ciardenìire”.
Pe ddolge stèvene le castaggnèdde, le carteddàte cu qquètte, taràlle e zzùccre, terrengìne, resògglie fatte cu stratte de mandarìne.
A SSande Stèfene la fèste condenuàve, ma se scève addolgènne.
Le femmenèdde decèvene ca Sande Stèfene iève nate acchesì:
“La sère de la Vesscìgglie, acquànne acchemenzò u rusce ca Gesù iève nate, tòtte le fèmmene mardàte, petèvene scì a ffà vìsete a la grotte de Betlèmme.
Stève na uaggnèddozze ca velève scì pure ièdde, ma p’u fatte ca iève pecenònne nom betève trasì. Allòre, ce facì? Pegghiò na pète, se la mettì m-brazze come ce iève nu pecenìnne iìnd’a le fasse. Trasì iìnd’a la grotte e se ne presciò totte a vedè Gesù bbammìne. Accòme stève acchesì s’avvecenòrene a ièdde dù uardiàne de la Sagra Famìgghie pe vedè ce stève sotte a le strazze.
La Madònne ca stève a vedè la sscène se n’avvertì ca la uaggnèdde se trevegghiò.
Come chidde ammenòrene la mane pe vedè, se sendì nu chiànde come acquànne u pecenìnne vole la mènne. E acchesì la pète devendò crestiàne e ccudde fu Sande Stèfene.
Mò, tutte chidde ca iìnd’a BBare vècchie se ièvene acchiàte a la case de nonònne, adrezzàvene prote e se ne scèvene o masòne lore.
Acchesì le fìiste de Natàle scèvene fernènne, ma nonn-èvene fernùte angòre.
Cèrte parìinde arremanèvene a la case de nonònne e, la dì de le Necìinde fatte l’ùldema mangiàte, se ne scèvene a le càsere lore. Pe cchèsse se decève:
“Pure lendàne cìinde mìgghie /S’aunìsce la famìgghie.
E la dì de le Necìinde / Se spartène le parìinde”.
Le uaggnùne ièvene chidde ca se laggnàvene percè pe llore le fìiste passàvene sùbbete. Se decève:
“Da Natàle a SSande Stèfene” pe ddisce ca na cose aderàve picche.
L’àlde ditte: “Natàle assutte e PPàsqua mbosse” e,
“Natàle da nande, non dande e non guànde. / Natàle da drète, trèmene le pète”.
Pe ddisce ca prime de Natàle u ffridde se petève cherrèsce. Da Natàle apprìisse tremuàvene le pète.

Altri siti utili

Cerca nel sito